Tos voigo a contá algo que m’el van dí el atro día als llavados, ñ’habeba un montó de donas llavan uns vellons, que per cierto en ñ'habeba de bllancos y de nègros, qui diban éban del Almuniero ,pues crego que fèba uns dias que habian chollau las ovellas del ramat que tienen.

Pues coma tos diba, resulta que el siño Toñet , aquell que viu all’alto al cabo llugá , se va caure de la somèra y se va esllomá. Lo malo me van di que le va pasa a defora y el pobre home no s'en podeba ana en ta casa ,pues no teniba forzas pa puya-se-ne a la soméra,.

Le contaba a la dóna qu’el va intentá tot , s'en va puya a una espona coma va podré y desde alli va querí monta-se ,pero mira per agon, chusto en ixe instante, Be-te-me tu que la somèra va arrancá a corré .

Ya tos podez imagina al seño Toñet, uns renecs , van sè tantos y tan altos, que van llega a senti-se hasta casi el llugá , y mira per agon, ixo el va salva, pues el va sentí el chove de Fermín que estaba cullin armellas asti al Ferruz y hie va acudí enseguida correns.

Mira ,en cuanto el siño Toñet el va vèr ,va pensá que se le había aparexiu la Virgen.

Ramonet, que axí se diba el chove Salamero , enseguida le va preguntá ¿ Qué l'ha pasau ? Cuan el va vèr llargo a tèrra coma un salamandran sin pode-se mòure.

Ay nino, ixa carnuz de somèra que se ha espantau, pues ha salliu un conill de asti de ixas matas a tèrra y al vèr-lo ha pegau un bote y me ha jodiu al suelo . Total que me he queriu encaramá en cima de la colchoneta , puyan-me a una espona, y ha sito pió el remeí que la enfermedad , la soméra h' apretau a corré , y como no m'hèba  agarrau pròu bèn , me ha tirau otra vegada a tèrra y encima he caiu del atro costat, ya veus ,no me puedo moure pa res.

Ramonet ,le va dí al siño Toñet , mire quede-se asti tranquilo, que yo me acerco al llugá a busca el carro y alguno trovaré que vinga a ayuda-me a puya-lo al carro pa lleva-lo al dotó , el cure y vèiga lo que le ha pasau .

Al rato, va vindre Ramonet con el fillo gran de Rastilladó ,y con molto cuidau el van estendre sobre una márfega que habian posau encima del carro.

Van ana poco a poco per el camino de Penallada pero fèba cuatre dias que había plloviu y estaba pllieno de rodèras y basals de aigua. Aquell carro se moveba mes que la pèdra del molino cuan estaba machacan las olivas. Total que el siño Toñet no paraba de chemecá y de renegá hasta que van llegá a casa del mèdico .

Van truca a la porta y al instante va baixa la suya dona, espantada per las trucadas tan fortas que había feito el chove Fermin.

¿ Qué pasa? va pregunta .

Mire siña Maria , que aixi se diba la dona del mèdico , le portan al siño Toñet pa que el veiga su marido, pues se ha caiu de la somèra y pensan que s’ha feito molto mal per dintro.

Au, pues puyaz-lo en ta'lto y estiraz-lo en ixa camilla que ñ'hey posat un llinzol llimpio, y així el van fè.

Va resultà que el dotó no hi’estaba perque había anau atendre al siño Pèdro que teniba una malentia que le diban las fiebres malta y le posaba una inyección cada día per las tardes.

El seño Toñet no paraba de chemecá y de renegá, pues crego que no sen donabá cuenta agón estaba.

La siña María le diba ¿ Per el amor de Dios, seño Toñet , com diu ixas barbaridaz?

Mire, no m’en faga caso ,pues no sé lo que me digo.

Al cabo del rato va llegá Don Joaquín que hèba el mèdico, y pareix que con solament ver-lo se le van pasá toz el mals.

Bueno, pues ixo tos conto, lo que va pasá el atro día.

El mal que se va fè el siño Toñet no el sé, per que ninguno ha dito res, si m'entero ya tol diré.

Uy, ¿ Hez visto que hora se mos ha feito? Ñ’habrá que ana-se-ne pa fè el disná.

Bueno ninas, ya quedarem pa'tro rato.

Adios m'en voigo.

Azanuy . Cuatre de Octubre del 2011

El Ferruz.